Luister Aanlyn

Luister Lichvaal Stereo aanlyn enige plek in die wereld van Duitsland tot Dubai!

Luister Nou Epos na Ateljee

Mark Aanwysers

Vonkelvrou

Marlette, die Vonkelvrou van Lichvaal Stereo nooi jou vriendelik om elke weeks oggend om 9 uur by haar aan te sluit vir 'n verskeidenheid onderwerpe. Maandae raak ons stil en kry kos vir die siel, Dinsdae bak en brou ons, Woensdae leef ons gesond, Donderdae praat ons oor alles en nog wat en Vrydae kuier ons by ons kontrei se mense; oud en jonk. Kom lag, leer, leef en "vonkel" saam my, Marlette, in Vonkelvrou.

Print
27
Oct

BEGINSELS VAN ONTWIKKELING VAN SELFBEHEER BY DIE KIND

on Sunday, 27 October 2013 18:36.

Renee Buskop, Maatskaplike Werker en Spelterapeut is my altejeegas en ons gesels oor die BEGINSEL VAN DIE ONTWIKKELING VAN SELFBEHEER BY DIE KIND.

Die meeste kinders wil een of ander stadium in hulle lewens wegloop.  Hulle voel groot en sterk en sonder enige beperking.  Hulle selfversekerheid is oordrewe.  Hulle het nog nie die beginsel van selfbeheer geleer nie.

Jy as ouer het die taak om dit vir hulle te leer deur jou voorbeeld.  Pas jy selfbeheer toe of gooi jy gereeld jou poppe uit die kot?

Wees te alle tye in kontak met jou kind.  Empatie is belangrik as jy jou kind wil leer.  Hy mag kwaad word wanneer julle deur hierdie dinge werk, my hy moet weet jy is daar vir hom, self as julle verskil en jy vir hom grense moet stel.

Moenie 'n beherende ouer wees nie.  Help jou kinb om die beperkinge van sy beheer te aanvaar deur jou eie beperkinge te aanvaar. Moenie dat jou kind jou keuses beheer nie.  As hy 'n tantrum gooi, moenie jou besluit verander nie. 

Werk aan selfbeskikkingsreg van jou kind.  Help hom om meer onafhanklik te raak in sy besluitneming oor sy lewe deur deurlopend toepaslike besluite met hom te bespreek en sy opinie van waarde te ag.

Jou kind moet leiding kry van jou as ouer en beheer kan jou kind help of skade aanrig.  Hy het die krag nodig wat voortspruit uit 'n realistiese sin vir selfbeheer en moet leer om self besluit te neem, maar ook om met die resultate saam te kleef.  Leer hom dat God ook insette in ons lewens het.

Vir meer oor hierdie onderwerp en nog meer, kontak vir Renee: 083 967 7110.  Renee is ook baie nou betrokke by ouerleiding van bied ook klasse aan.  Sy het 'n passie vir kinders en doen berading en spelterapie asook berading vir volwassenes.

Mooi bly.

ESTELKLE

Print
27
Oct

EMOSIONELE INTELLIGENSIE

on Sunday, 27 October 2013 18:18.

DR TESSA VAN WIJK is weer vanoggend saam met my in die ateljee en vandag gaan die gesprek oor EMOSIONELE INTELLIGENSIE.

Die eerste spontane vraag wat gevrae kan word, is WAT is emosionele intelligensie?  Dit is die vermoë om emosies te ervaar en te verstaan, van jouself en van ander mense, om onderskeid te tref tussen sekere emosies en dit op die naam te noem, die vermoë om jou emosies uit te druk en te beheer.  Dit is ook die vermoë om na ander te luister, met ander te kommunikeer, jouself te motiveer.  Dit is om deur te druk wanneer dinge swaar gaan (deursettingsvermoë), die regte keuses te maak TEN SPYTE VAN  jou emosies en om emosioneel bewus te wees van ander mense se swaarkry.

Om emosioneel intelligent te wees moet jy jouself ken.  Jy moet jouself verstaan en 'n goeie verhouding met jouself he.  Jou selfbeeld is ook belangrik.  Baie mense dra hulle hele lewe lank 'n masker om iets weg te steek, dalk 'n groot seer waarvan niemand moet weet nie. So baie energie word aan voorgee bestee dat ons soms vergeet om te lewe en die lewe te geniet.

Die belangrikste rondom emosionele intelligensie is om selfgeldend te wees - dit beteken om genoeg selfvertroue te he oor wat JY in die lewe wil hê en dit te kommunikeer.  Dit beteken nie noodwendig dat jy altyd jou manier van dinge doen gaan kry nie, maar leer om 'n kompromie aan te gaan.

Selfgeldende gedrag is NIE om 'n "pleaser" te wees nie, moenie passief wees deur konflik te vermy of te voel jy is hopeloos nie.  Moenie aggressief wees en almal verskree nie en moet ook nie manipulerend wees nie.

Selfgeldende gedrag is die feit dat jy eerlik kan kommunikeer, jou woede beheer, op jou regte staan.  Jy kyk altyd na oplossings, stel jou grense.  Mense respekteer jou want jy respekteer hulle. Jy gee om vir jouself en ondermyn nie jou behoeftes nie.

As jy emosioneel intelligent is, sal jy sit ook aan jou kinders oordra en sodoende emosionele volwassenes die wêreld instuur.

Dr Tessa van Wijk se kontakbesonderhede is:

Selnr: 082 804 9886, Twitter:  AskDocTessa, Facebook: Doc Tessa en E-pos: doctessa@gmail.com.

Tot volgende keer, mooi bly.

ESTELLE

Print
27
Oct

GUNSTELING-DISSE

on Sunday, 27 October 2013 17:50.

Die volgende 2 weke gesels ons oor gunstelingdisse - eenkeer 'n wennerdis, alktyd 'n wennerdis!

EK deel met jou 'n wonderlike nagereg vir enige geleentheid, van Kersfees tot sommer net lekker saamkuier.  Beproef dit gerus, dis nie moeilik nie en kan lank voor die tyd berei word.

Hierdie cassata bevat baie eierwitte en is dus nie so ryk soos normaalweg nie.

CASSATA

 6 eierwitte, by kamertemperatuur, 125 ml strooisuiker, 500 ml room, 250 ml gekapte neute of grondboon-sprinkelneute, 400 ml gemengde droevrugte soos glanskersies, neute, sultannas of koekmengseldroevrugte.

Voer 'n broodpan, ringpan of 'n interessante vrieshouer met volume van 1.75 liter met kleefplastiek uit.  Klits die eiewitte in droe, vetvrye mengbak tot skuimering.  Klits helfte van strooisuiker geleidelik by en klits tot punte vorms.  Hou eenkant.  Klits room en oorblywende helfte strooisuiker in ander mengbak saam tot styf.  Vou room liggies met metaallepel by eierwitte.  Vou neute en droe vrugte by.  Plaas glanskersies, neute of droevrugte op die bodem van jou houer.  Skep cassata mengsel bo-op en maak gelyk.  Bevries tot hard.  Haal die cassata 'n rukkie voor  bedieniung uit die  vrieskas, keer uit op mooi opdienbord, verwyder kleefplastiek.  Strooi neute onder om die rand van cassata sodat dit mooi afgewerk lyk.  Sny in skyfies en dien op saam met 'n lekker roomyssous.

Bedek die cassata wat oorbly met kleefplastiek en bewaar in vrieskas tot benodig.

HEERLIK!!

 Volgende week meer smaaklike en maklike gunstelingresepte!

Mooi bly!

ESTELLE

  

Print
21
Oct

ALKOHOLISME

on Monday, 21 October 2013 19:25.

My ateljeegas was Piet Kearny, 'n man wat na homself verwys as 'n "gerehabiliteerde alkoholis". Piet het die pad gestap van verslawing en kan met reg praat oor hierdie verslawing waarmee talle mense worstel.

Daar is wel hoop, die pad van genesing is daar vir enige persoon wat ten eerste sy probleem erken en 'n wilsbesluit neem om te verander.  Dat dit 'n moeilike pad is om te stap betwyfel niemand nie, maar die beloning is onbeskryfbaar groot.

Indien jy met iemand wil gesels en/of raad wil he, met iemand wil praat wat jou sal verstaan, kan jy sonder om te aarsel vir Piet kontak.  Sy nr is 018 632 4339. 

Met die hulp van die HERE is niks onmoontlik nie en kan jy jou lewe omkeer.

Amazing Grace - beskikbaar vir almal.

Liefdegroete

ESTELLE

Print
18
Oct

HOEKOM HUIL MY BABA?

on Friday, 18 October 2013 17:14.

Niks is so belangrik soos jou baba nie.  Wanneer jou baba huil, is dit sy manier van kommunikasie. Hou in gedagte dat jou baba vir 9 maande veilig, warm, gekoester en versadig was.  Hy het jou stem gereeld gehoor, die geluid van jou hartklop en die ruising van bloed deur jou are.  Nou word jou baba gebore en is in 'n heel nuwe omgewing wat totaal onbekend is en hom ook onveilig kan laat voel.  Jou baba sal nie huil as daar niks fout is nie. 

Harde musiek, helder ligte, te veel aanraking van vreemdelinge is alles dinge wat jou baba onveilig kan laat voel en ook die lyfie kan uitput.  Vel tot vel kontak is ook baie belangrik, jou baba wil jou voel.

Moenie jou pasgebore baba se gehuil ignoreer nie.  Hoe gouer jy reageer, hoe vinniger sal jou baba veilig en geborge voel.  Tel hom op, sus hom, praat met hom.  Kyk dat sy doek droog is, hy voldoende gedrink het en daar nie dalk strokies aan sy klere is wat dalk krap nie.  Maak ook seker sy doek is nie te styf nie en dat al die winde uitgeklop is na 'n voeding.

Redes wat dalk kan veroorsaak dat baba huil is o.a. 'n gevoel van alleenheid, honger, ongemaklik, voel siek of/en het pyn en koliek.  Moenie jou baba elke 4 ure voed nie, voed hom op aanvraag.  Onthou wat ek in die begin geskryf het, hy ken nie die gevoel van honger nie, ook nie koue en eensaamheid nie.

Neem jou baba dokter toe indien jy onrustig voel. 

Geniet jou baba en vra hulp as jy voel jy kan nie alles hanteer nie.  Nageboortelike depressie onder mammas is nie ongewoon nie en niks om oor skaam te wees nie.  Gaan sien jou dokter en kry hulp, maar moenie jou baba verantwoordelik hou en afskeep nie.

Geniet jou baba.

ESTELLE

Kontak Vonkelvrou

captcha
Reload